Viti 2026 ka qenë plot rikthime të shumëpritura. Nga muzika te kinemaja, emra dhe projekte të njohura po rikthehen në qendër të vëmendjes. Për adhuruesit e bukurisë, megjithatë, një nga rikthimet më të komentuara ka qenë ai i Marc Jacobs Beauty.
Pas ndërprerjes së papritur në vitin 2021, marka më në fund është rikthyer në treg. Por sipas vetë brendit, kjo nuk duhet parë si vazhdim i asaj që ishte dikur. Në fakt, Marc Jacobs Beauty po prezantohet si një kapitull krejtësisht i ri.
Formulat janë të reja. Teksturat janë të reja. Edhe paketimi është transformuar plotësisht.
Për ata që prisnin rikthimin e produkteve ikonike që dikur e bënë markën kult, surpriza është e qartë: ky nuk është Marc Jacobs Beauty i vitit 2013. Është një version i ri që ruan emrin, por jo domosdoshmërisht identitetin e mëparshëm.
Megjithatë, një element mbetet i pandryshuar: dashuria e Marc Jacobs për makeup-in e syve.
“Njerëzit i shikoj fillimisht në sy. Aty ka më shumë hapësirë për eksperimentim dhe shprehje,” është shprehur dizajneri gjatë prezantimit të koleksionit të ri.
Dhe kjo reflektohet qartë në koleksion. Linja e re sjell eyeliner në 21 nuanca, hijë sysh me pigment të lartë dhe mascara me ngjyra të ndryshme, duke vendosur sytë në qendër të vëmendjes.
Ndërkohë, paketimet e zeza minimaliste që karakterizonin markën origjinale i kanë lënë vendin një estetike shumë më lozonjare. Zemra, yje dhe margarita metalike shfaqen në të gjithë koleksionin, duke reflektuar një energji më të guximshme dhe më të gëzueshme.
Në një periudhë kur estetika “clean girl” ka dominuar industrinë e bukurisë, Marc Jacobs Beauty duket se po propozon diçka tjetër: më shumë ngjyrë, më shumë eksperimentim dhe më shumë argëtim.